اسلام آباد۔30ستمبر(اے پی پی)سپیکر قومی اسمبلی راجہ پرویز اشرف انڈونیشیا نال اقتصادی و پارلیمانی تعلقات ٻیا ودھاوݨ تے زور ݙیندے پارلیمانی سفارتکاری سانڳے روابط ودھاوݨ دا آکھیے۔ او اسلام آباد اچ انڈونیشیا دے سفیر آدم ملاورمان ٹگیو نال ملݨ ویلھے الیندے پئے ہن۔ انہاں ݙوطرفہ تعلقات، باہمی دلچسپی دے امور سودھا اقتصادی و پارلیمانی تعلقات اتے عوامی روابط سانڳے تعاون تے الایا۔ انہاں انڈونیشی سفیر کوں سیلاب دی تباہ کاریاں دا وی ݙسایا۔ انہاں آکھیا جو آندے مہینے روانڈا اچ تھیوݨ آلے آئی پی یو جنرل اسمبلی اجلاس اچ قومی اسمبلی آف پاکستان موسمیاتی تبدیلیاں دے نقصانات ایمرجنسی آئٹم سانڳے ایجنڈے اچ رلاوݨ کیتے سیکرٹری جنرل آئی پی یو کوں خط لکھیے جو ایں سانڳے عالمی فنڈ قائم کیتا ونڄے۔ انڈونیشین سفیر سیلاب نال نقصانات تے افسوس کریندے پاکستان نال یکجہتی کیتے اتے آئی پی یو اجلاس اچ پاکستان ولوں عالمی فنڈ دے قیام دی تجویز دی حمایت دا یقین ݙیوائے۔
