اسلام آباد۔17اگست (اے پی پی) وفاقی وزیر اطلاعات تے نشریات چوہدری فواد حسین آکھیا جو پاکستان عالمی برادری دا ذمہ وار ملک اے، طالبان حکومت کوں منݨ دا فیصلہ ہک پاسہ نی علاقائی اتے عالمی طاقتاں نال رَل تے کریسوں۔ افغانستان اچ ایں ویلھے صورتحال اطمینان بخش اے۔ اے سوھݨی ڳالھ اے جو کابل اچ اجاں تئیں کوئی تشدد دا واقعہ نی تھیا، توقع اے جو طالبان افغانستان اچ قانون دی حکمرانی اتے بنیادی انسانی حقوق دا احترام کریسن۔ پاکستان اشرف غنی کوں کئی واری مشورہ ݙتا جو او کلھیں حکومت نی کرسڳدے، وزیراعظم عمران خان باجوڑ جلسے اچ خطاب کریندیں ہوئیں افغان حکومت کوں آکھیا ہئیجو او الیکشن دی تیاری دی بجائے مختلف گروپاں نال ڳالھ کر تے ہک پاسہ حکومت بݨاون، عاشورہ دے احترام اچ پاکستان تحریک انصاف دی حکومت دی ترائے سال پورے تھیوݨ تے تقریبات موخر کرݨ دا فیصلہ کیتا ڳئے، کرپشن فریم مضبوط اتے مستحکم پاکستان اتے مدینہ دی ریاست دے ماڈل دا وعدہ تے کاربند ہیسے۔ وفاقی کابینہ ملک اچ کھیڈاں دی وڳڑدی ہوئی صورتحال تے تشویش کریندیں ہوئیں بین الصوبائی روابط دی وزارت کوں نویں سپورٹس پالیسی بݨاوݨ دی ہدایت کیتی اے، وزیراعظم اٹھویں، نانویں اتے ݙاہویں جماعتاں اچ سیرت النبی ﷺ دی تعلیم لازمی پڑھاوݨ تے زور ݙتے،مشیر برائے پارلیمانی امور ای وی ایم دے بارے کابینہ کوں بریفنگ ݙتی، لیفٹیننٹ جنرل (ر) مزمل حسین کوں واپڈا دا ولا چیئرمین لاوݨ دی منظوری ݙے ݙتی ڳئی اے۔ منگل کوں وفاقی کابینہ دے اجلاس دے بعد میڈیا کوں بریفنگ ݙیندیں ہوئیں چوہدری فواد حسین آکھیا جو وزیراعظم افغانستان دے مسئلے تے کابینہ کوں اعتماد اچ ڳھدے اتے نیشنل سکیورٹی کونسل دے فیصلیاں بارے وی ݙسیے۔ انہاں ݙسیا جو افغانستان بارے اساݙا موقف پہلے وی نشابر ہئی اتے ہݨ وی نشابر اے۔ افغانستان اچ طالبان دی حکومت کوں منݨ دے معاملے تے خطے دے ٻئے ملکاں نال رل تے فیصلہ کریسوں۔ پاکستان عالمی برادری دا ہک ذمہ وارملک اے۔ انہاں ݙسیا جو وزیراعظم عمران خان دی ݙو ݙینھ پہلے ترکی دے صدر طیب اردوان نال تفصیلی ڳالھ تھئی اے۔ گزریل ݙینھ امریکہ دے وزیرخارجہ پاکستان دی وزیرخارجہ شاہ محمود قریشی نال تفصیلی ڳالھ کیتی اے۔ اساں افغانستان اچ ٻئے گروپاں نال وی رابطے اچ ہیسے۔ انہاں آکھیا جو اساں توقع کریندوں جو طالبان افغانستان اچ قانون دی حکمرانی، بنیادی انسانی حقوق دا احترام کریسن۔ گزریل ݙینھ اساں قومی سلامتی کونسل دے اجلاس اچ وی ایں ڳالھ تے زورݙتے جو اساں چاہندوں جو کابل اچ نویں حکومت بین الاقوامی بنیادی انسانی حقوق دا احترام کریسی۔ وفاقی وزیر اطلاعات آکھیا جو ۔ پاکستان اشرف غنی کوں کئی واری مشورہ ݙتا جو او کلھیں حکومت نی کرسڳدے، وزیراعظم عمران خان باجوڑ جلسے اچ خطاب کریندیں ہوئیں افغان حکومت کوں آکھیا ہئیجو او الیکشن دی تیاری دی بجائے مختلف گروپاں نال ڳالھ کر تے ہک پاسہ حکومت بݨاون۔انہاں آکھیا جو وزیراعظم اتے کابینہ دے ارکان ترائے سالیں اچ آپݨے حلف دی پاسداری کریندیں ہوئیں قوم توں کیتے ڳئے وعدے پورے کرݨ سانڳے اقدامات کیتن جئیں تے وزیراعظم کابینہ کوں مبارخ ݙتی ای اے۔ اے اقدامات آندے سالٰیں اچ وی جاری رہسن۔ کرپشن فری، مضبوط اتے مستحکم پاکستان اتے مدینہ دی ریاست دے ماڈل دے وعدے تے کاربند ہیسے۔ عاشورہ دے بعد قوم کوں ایں تے اعتماد اچ ڳھنسوں۔ وفاقی وزیر اطلاعات ݙسیا جو وزیراعظم وزیر تعلیم شفقت محمود اتے انہاں دی ٹیم کوں ہک قومی نصاب دے اجراء تے مبارخ ݙتی ۔ وزیراعظم عمران خان قوم کوں کٹھا کرݨ، معاشرتی تفریق مکاوݨ اتے پاکستانیت اجاگر کرݨ بارے ہک نصاب کوں کلیدی اہمیت قرار ݙتے۔ وفاقی وزیر اطلاعات آکھیا جو اڄ ہک قوم ہک نصاب دا وعدہ ہئی ، ایں ویلھے پاکستان دے سکولاں اچ مختلف نصاب پڑھائے ویندے پئن۔ اساݙا موقف ہئی جو تعلیم دے گھٹ توں گھٹ معیارات ہک سویں ہووݨے چاہیدن۔
