اسلام آباد۔19اکتوبر (اے پی پی):صدر مملکت ڈاکٹر عارف علوی پاکستان اچ فلسطین دے سفارت خانے دا دورہ کیتے اتے اسرائیل دے ہتھوں اندھا دھند قتل عام دا نشانہ بݨݨ آلے فلسطینیاں نال یکجہتی دا اظہار کیتے۔ انہاں عالمی برادری تے زور ݙتے جو او اسرائیل دی بربریت تے ایندے غیر متناسب ردعمل اچ ہزاراں بے گناہ لوکاں دی شہادت دی مذمت کرے۔ صدر مملکت فوری جنگ بندی اتے خوراک، بجلی اتے پاݨی توں محروم لوکاں تئیں امداد بھیڄݨ سانڳے ھک انسانی راہداری کھولݨ دا مطالبہ کیتے۔ ایوان صدر دے پریس ونگ موجب صدر مملکت اسلام آباد اچ فلسطین دے سفیر احمد جواد ربیع نال وی ملاقات کیتی تے پاکستانی حکومت اتے عوام دی طرفوں فلسطینی عوام نال یکجہتی دا اظہار کیتے۔ انہاں آکھیے پاکستان ہمیشہ فلسطین دے نال کھڑا رہسی تے صرف اوہو حل قبول کریسی جیڑھا فلسطینیاں کیتے قابل قبول ہووے۔ ایں موقع تے صدر مملکت آکھیے اقوام متحدہ کوں فلسطین اچ تھیوݨ آلے ظلم تے بحث کرݨی چاہیدی اے ، اقوام متحدہ دی سلامتی کونسل اسرائیلی ظلم روکݨ کیتے قرارداد پاس کرے۔ ایندے توں پہلے صدر مملکت فلسطینی سفارتخانے اچ تعزیتی کتاب اچ آپݨے تاثرات وی قلمبند کیتے اتے فلسطینی عوام اتے وحشیانہ اسرائیلی حملیں اچ آپݨیاں جاناں ونڄا ݙیوݨ آلے شہدا دے گھرآلیں نال دلی تعزیت دا اظہار کیتے
