اسلام آباد۔24مارچ(اے پی پی):آذربائیجان دے دارالحکومت باکو اچ پاکستان دے سفارت خانے یوم پاکستان دے حوالے نال ھک تقریب دا انعقاد کیتا ڳئے ۔ باکو اچ منعقدہ تقریب اچ پاکستان دا قومی پرچم وی لہرایا ڳئے، تقریب اچ سفارتی عملہ اتے ٻئی اہم شخصیات شرکت کیتی ۔ تقریب توں خطاب کریندے ہوئیں آذربائیجان اچ پاکستان دے سفیر بلال حئی یوم پاکستان دی اہمیت دا ذکر کریندے ہوئیں آکھیے جو اے ݙینھ سارے پاکستانیاں کیتے اہمیت رکھیندے ، 23 مارچ 1940 کوں برصغیر دے مسلماناں لاہور اچ ھک قرارداد پاس کر تے برصغیر دے مسلماناں کیتے ھک ایجھی ریاست بݨاوݨ دا فیصلہ کیتا جتھاں او آپݨی اقدار اتے روایات دے مطابق زندگی گزار سڳن ۔ 1940 اچ برصغیر دے مسلماناں تحریک پاکستان کیتے بھرپور جدوجہد شروع کیتی تے صرف ست سال اچ پاکستان ھک حقیقت بݨ ڳیا تے دنیا دے نقشے تے ھک خودمختار ریاست دے طور تے ابھریا ۔ انہاں آکھیے پاکستان سارے بین الاقوامی اتے علاقائی پلیٹ فارمز تے مسلسل حمایت تے بھرا ملک آذربائیجان دا شکر گزار اے۔ݙوہیں ملک ھک ݙوجھے نال مونڈھے نال مونڈھا رلا تے کھڑن۔
