اسلام آباد۔21ستمبر (اے پی پی) وفاقی وزیر داخلہ رانا ثنا اللہ خان آکھیا جو توشہ خانہ ریفرنس اچ چور رنگے ہتھوں پکڑیا ڳئے، پڑتال کرو تاں شوکت خانم ہسپتال اتے نمل یونیورسٹی اچ وی عمران خان دی چوری پکڑی ویسی۔ عمران خان 26 کروڑ روپے دا فراڈ کیتے، سونے دے قلم چوری کیتے، عمران خان توہین عدالت کیتی اے جیڑھی ثابت اے، ہݨ عمران خان معافی منڳ ڳھنے تاں توہین عدالت کائنا ختم تھیسی۔ جیڑھے صوبے عمران خان دے لانگ مارچ کوں سپورٹ کریسن او آئین دی خلاف ورزی کریسن اتے وفاقی حکومت آئین دے مطابق کم چیسی۔ او بدھ کوں ایف آئی اے اتے یو این او ڈی سی دی سانجھ نال اعلیٰ سطحی مشاورتی ورکشاپ نال خطاب کریندے پئے ہن۔ ڈی جی ایف آئی اے محسن حسن بٹ ، یو این او ڈی سی پاکستان دے نمائندہ جرمی ملسیم، انٹر نیشنل آرگنائزیشن فارامائیگریشن دے چیف آف مشن میلو سیٹو ،نیشنل ٹی آئی پی کمیٹی دے کوآرڈینیٹر جاوید اختر ریاض اتے ایڈیشنل ڈی جی ایف آئی اے اشرف زبیر صدیقی، ایگزیکٹو ڈائریکٹر ایس اسی ڈی او سید کوثر عباس سمیت سول سوسائٹی اتے این جی اوز دے نمائندے وی تقریب اچ شریک ہن۔
