راولپنڈی۔22فروری (اے پی پی) آپریشن ردالفساد دے پنڄ سال پورے ، چیف آف آرمی سٹاف جنرل قمر جاوید باجوہ دہشت گردی دے خلاف شہیداں دی قربانیاں کوں سلام پیش کیتے۔ پاک فوج دے شعبہ تعلقات عامہ (آئی ایس پی آر) دے ڈی جی میجر جنرل بابر افتخار منگل کوں آپݨے ٹویٹ اچ آکھیا جو آپریشن ردالفساد دے پنڄ سال پورے تھی ڳئن، ایں دا مقصد دہشت گردی دے خلاف ݙو ݙھاکیاں دی وݙی جنگ دے فائدے کوں مستحکم کرݨ اتے ملک اچ دہشت گرداں دی باقیات کوں ختم کرݨ اے۔ ڈی جی آئی ایس پی آر دے مطابق آپریشن ردالفساد اچ پاکستان دے لوکاں دی حفاظت کوں بنیادی مقصد دے طور رکھیا ڳئے۔ آپریشن کامیابی نال جاری اے اتے ملک امن آلے پاسے منتقل تھیندا پئے۔
