اسلام آباد ۔10 نومبر(اے پی پی)ترجمان دفتر خارجہ آکھیے جو اقوام متحدہ دی مرکزی کمیٹی ولوں ترائے قرارداداں دی منظوری علاقائی تے بین الاقوامی امن تے سلامتی سانگے پاکستانی عزم دا ثبوت ہے۔علاقائی امن تے استحکام تے تخفیف اسلحہ توں متعلق پاکستان 8نومبر کوں ا یہ قرارداداں پیش کیتیاں ہن ۔ہفتہ کوں اپنڑے ہک ٹویٹ اچ ترجمان آکھیے جو پاکستان علاقائی تے بین الاقوامی امن تے استحکام دی غرض نال گلوبل تخفیف اسلحہ کوششاں دی حمایت سانگے بی توجہ ڈیسی۔انہاں قرارداداں اچ علاقائی تخفیف اسلحہ، علاقائی اتے سب ریجنل سطح تے روایتی آرمز کنٹرول اتے اعتماد ودھاونر دے اقدامات تے توجہ ڈتی گی ہائی۔ترجمان دا آکھنڑ ہا جو قرارداداں اچ تخفیف اسلحہ سانگے علاقائی اپرووچ دی اہمیت کوں اجاگر کیتے اتے علاقائی امن تے سلامتی سانگے اعتماد سازی اقدامات کو ں ودھاراکرنڑ دی ضرورت تے زور ڈتا گیا ہا۔ایں توں پہلے کمیٹی 122 ووٹاں دی مضبوط اکثریت نال ایٹمی ہتھیاراں دے استعمال یا خطرے دے خلاف غیر جوہری ریاستاں کوں یقین دہانی توں متعلق پاکستان ولوں سالانہ قرارداد دی منظوری ڈے ڈتی ہائی ۔
