اسلام آباد۔22دسمبر (اے پی پی):وزیراعظم عمران خان آکھیے جو حکومت کاشتکاری دے شعبہ اچ بہتر تکنیک اپنا تے فصلاں دی فی ایکڑ پیداوار ودھاوݨ تے توجہ ݙیندی پئی اے ، بج تے کھاداں دے بہتر معیار دی پیداوار کیتے تحقیق و ترقی اچ سرمایہ کاری کریندے پئن۔ وزیراعظم عمران خان دی زیر صدارت بدھ کوں ملک اچ خریف دیاں فصلاں متعلق اجلاس منعقد تھیا جیں اچ وفاقی وزیر نیشنل فوڈ سکیورٹی سیّد فخر امام، مشیر خزانہ شوکت فیاض ترین، مشیر تجارت عبدالرزاق دائود، وزیر صنعت مخدوم خسرو بختیار اتے بئے اعلیٰ حکام موجود ہن ۔ صوبائی وزراء زراعت پنجاب، سندھ، کے پی اتے بلوچستان ویڈیو لنک دے ذریعے اجلاس اچ شرکت کیتی۔ ایں موقع تے وزیراعظم کوں ݙسایا ڳیا جو خریف دیاں فصلاں اچ کپاہ چاول، مکئی اتے گنا ملک اچ کاشت کیتی ونڄݨ آلیاں وݙیاں فصلاں ہن ، حکومت دی زراعت دوست پالیسیاں دی وجہ توں انہاں ساریاں فصلاں دی فی ایکڑ پیداوار اچ ودھارے دا رجحان ݙٹھا ویندا پئے ۔ وزیراعظم کوں ݙسیا ڳیا جو چنڳے معیار دے بجاں اتے کیڑے مار دوائیں، مؤثر تحقیق و ترقی اتے ٹیکنالوجی دی منتقلی اچ بھاری سرمایہ کاری کرتے ملک اچ زرعی شعبہ کوں مزید بہتر بݨایا ونڄ سڳدے۔ وزیراعظم متعلقہ حکام کوں ہدایت کیتی جو ملک اچ غذائی تحفظ کوں یقینی بݨاوݨ کیتے ساریاں فصلاں دی پیداوار کوں بہتر بݨاوݨ کیتے ہر ممکنہ اقدامات کیتے ونڄن ۔
