اسلام آباد۔26ستمبر(اے پی پی)جموں و کشمیر بارے اسلامی تعاون تنظیم (او آئی سی) دے رابطہ گروپ دا اجلاس نیویارک اچ اقوام متحدہ دی جنرل اسمبلی دے 79ویں اجلاس تھئے جیندی صدارت او آئی سی دے سیکرٹری جنرل حسین براہیم طحہ کیتی۔ رکن ملک پاکستان، سعودی عرب، ترکی، نائجر اتے آذربائیجان اجلاساچ موجود ہن ڄݙاں جو کشمیری عوام دے حقیقی نمائندیاں دا وفد دی اجلاس اچ ہا۔ اجلاس اچ پاکستانی وفد دی اڳواݨی وزیر دفاع خواجہ محمد آصف کیتی اتے رابطہ گروپ کوں بھارت دے غیر قانونی زیر تسلط جموں و کشمیر اچ سیاسی، سلامتی و انسانی حقوق دی صورتحال ݙسائی۔ ترجمان دفتر خارجہ آکھیے جو رابطہ گروپ دے رکن ممالک او آئی سی دے ایجنڈے اچ تنازعہ جموں و کشمیر دی اہمیت ودھیندے کشمیری عوام دے حقوق اتے آزادیاں دی حمایت کیتی اتے تنازعہ جموں و کشمیر دے تیکھے اتے پرامن حل تے زور ݙتے۔ اجلاس دے اعلامیے اچ اقوام متحدہ دی سلامتی کونسل دی متعلقہ قرارداداں دے مطابق کشمیری عوام دے ناقابل تنسیخ حق خودارادیت سانڳے او آئی سی ولوں کشمیریاں دی جائز جدوجہد دی مسلسل حمایت دوہرائی۔ مشترکہ اعلامیہ اچ کئی کشمیری سیاسی جماعتاں تے پابندی اتے کشمیر دی تحریک آزادی دے کارکناں دیاں جائیداداں ضبط کرݨ دی جاری مہم دی مذمت کیتی گئی۔ رابطہ گروپ مطالبہ کتیے جو بھارت مقبوضہ کشمیر اچ انسانی حقوق دیاں خلاف ورزیاں روکے اتے مسئلہ دا عوام دی خواہشات دے مطابق حل کݙھے۔ ترجمان آکھیے جو پاکستان اقوام متحدہ دی سلامتی کونسل دی قرارداداں دے مطابق تنازعہ جموں و کشمیر دے منصفانہ اتے پرامن حل کیتے کشمیری بھراواں اتے ٻھیݨیں دی سیاسی، سفارتی و اخلاقی حمایت جاری رکھسی۔
