اسلام آباد۔25اگست(اے پی پی)سپیکر قومی اسمبلی سردار ایاز صادق قوم توں اپیل کریندے آکھیے جو سیلاب زدگاں دی مدد کیتے ہر ہک کوں رل مل تے کردار ادا کرݨ دی لوڑھ اے، مخیر حضرات، فلاحی ادارے اتے سول سوسائٹی متاثرین دی مدد کیتے اڳو تے ودھن۔ آپݨے بیان اچ انہاں آکھیا جو مخیر حضرات اتے سول سوسائٹی حکومت دیاں امدادی کوششاں اچ ہتھ ونݙاون، بحثیت القوم سیلاب متاثرین دی بحالی اساݙی کٹٖھی ذمے واری اے، کے پی، گلگت بلتستان، آزاد جموں و کشمیر اتے ملک دے ݙوجھے علاقیاں دے متاثرین کوں فوری ریلیف دی لوڑ اے، مخیر حضرات متاثرین دی بحالی اتے گھراں دی نویں سروں تعمیر کیتے دل کھول تے مدد کرن۔ انہاں نینگراں توں سیلاب متاثرین دی مدد اچ ودھ چڑھ تے حصہ گھنݨ دی اپیل کیتی اتے آکھیا جو نینگر رضاکار بݨ تے متاثرین دی بحالی، خوراک اتے امدادی سرگرمیاں اچ حصہ گھنن۔ انہاں آکھیا جو سیلاب متاثرین دی بحالی کیتے قومی جذبے، ایثار اتے بھائی چارا ݙکھاوݨ دی لوڑھ اے، اے ویلھا ہک تھیوݨ اتے ہمدردی دا اے، متاثرین کوں احساس ݙیواؤ جو او کلہے نئیں۔ انہاں دا آکھݨ ہئی جو ایں اوکھے ویلھے ہک ݙوڄھے دا سہارا بݨݨ ساݙا قومی فریضہ اے۔
